"Rock and Roll"-ის ვარსკვლავები სუპერჯგუფში ერთიანდებიან...

ბრიტანული ჯგუფის „Led Zeppelin“ ყოფილმა ბასისტმა – ჯონ პოლ ჯონსმა, „Foo Fighters“-სა და „Nirvana“–ს ყოფილმა წევრმა დეივ გროლმა და ჯგუფის „Queens of the Stone Age“ ლიდერმა ჯოშ ომმა ახალი სუპერჯგუფი ჩამოაყალიბეს.

ფორმალურად კოლექტივი დიდი ხანია არსებობს, თუმცა, მისი წევრები ამ ფაქტს ასაიდუმლოებდნენ და ახალი ჯგუფი „Them Crooked Vultures“ ოფიციალურად მხოლოდ ახლა წარუდგინეს პუბლიკას.

ინფორმაცია იმის შესახებ, რომ მულტიინსტრუმენტალისტი ჯოში და მისი კოლეგები ომმი და გროლი საერთო შემოქმედებითი საქმიანობით იყვნენ დაკავებულები, ჯერ კიდევ ოთხი წლის წინ გაჩნდა. 2005 წელს ჯგუფის „Foo Fighters“ ვოკალისტმა და გიტარისტმა, ბრიტანულ გამომცემლობისთვის „Mojo“ მიცემულ ინტერვიუში განაცხადა, რომ ის და მისი კოლეგები ახალ პროექტზე მუშაობენ.

თუმცა, ინტერვიუს დროს გროლი იმდენად სიტყვაძუნწი იყო, რომ არც ჯგუფის სახელწოდება, არც შემადგენლობა და არც ის გაუმჟღავნებია, თუ როდის წარსდგებოდა ახალი ჯგუფი საზოგადოების წინაშე.

2009 წლის დასაწყისში ომის მეუღლემ - ბროდი დეილმა, პორტალზე Antiquiet.com განაცხადა, რომ მისი ქმარი ახალი, ბრწყინვალე პროექტით არის დაკავებული, რომლის მსგავსიც აქამდე არავის გაუგია და უნახავს.

თუმცა, პროექტის შესახებ არც მას უთქვამს სხვა არაფერი და დეტალები არ დაუკონკრეტებია. მხოლოდ ხაზი იმას გაუსვა, რომ უფლება არ აქვს ომის, გროლის და ჯონსის სამუშაოს შესახებ ისაუბროს.

რამდენიმე კვირის შემდეგ, ჯგუფის „Eagles of Death Metal“ ვოკალისტმა ჯესი ჰიუგსმა, ერთ-ერთ ინტერვიუში განაცხადა, რომ საზოგადოება მალე ახალ ჯგუფს „Them Crooked Vultures“ გაიცნობდა, რომელის წევრებიც გროლი, ომი და ჯონსი იქნებიან.

სუპერჯგუფს ოფიციალური გვერდი, „Facebook“-ზე, პროფაილი, „MySpace“-ზე და მიკრობლოგი „Twitter“-ზე აქვს. თუმცა, ვერსად ჯგუფის შესახებ ინფორმაციას ვერ ამოიკითხავთ, რადგან მათზე მხოლოდ ლინკებია განთავსებული. მოკლედ, ჩაკეტილი წრეა შეკრული.

ერთი რამე კი დანამდვილებით შეიძლება ითქვას - მუსიკოსებმა ახალ პროექტში თავიანთი შემოქმედებითი და სულიერი რესურსები მთლიანად ჩააქსოვეს.

2005 წელს ჯონ პოლ ჯონსი და ჯონ ომმი გროლს დისკის „In Your Honor“ ჩაწერაში დაეხმარნენ. მას შემდეგ კი, რაც დისკის რელიზი შედგა, დეივი მიხვდა, რომ ჯონსთან ურთიერთობა ბედნიერება იყო. 2008 წელს გროლმა მის კუმირს ჯგუფთან „Foo Fighetrs“ ერთად, ლონდონის „უემბლის“ სტადიონზე გამოსვლა შესთავაზა.

ჯგუფის წევრების ახლო მეგობარმა გაზეთ „The Guardian“ -ს უამბო, რომ სადებიუტო გამოსვლის გარდა ჯგუფი შეიძლება სხვა სერიოზულს არც არაფერს გეგმავდეს. მისი სიტყვებით, მუსიკოსები სცენაზე არა როგორც ჯგუფი, არამედ, როგორც ძველი მეგობრები ისე გამოვლენ. თუმცა Antiquiet.com გვახსენებს, რომ 2009 წლის აპრილში ჯონ პოლ ჯონსმა ერთ ფრანგ ჟურნალისტს განუცხადა, რომ მალე მსოფლიოს ახალ პროექტს წარუდგენდა, რომელთან ერთადაც მთელ ქვეყანაში გამართავდა საკონცერტო ტურნეს.

„Blabbermouth“-ის ინფორმაციით, სუპერჯგუფმა სადებიუტო დისკი „Never Deserved The Future“ ლეიბლთან „Interscope“ ჩაწერა, რომლის პრეზენტაციაც 23 ნოემბერს შედგება.

ამ ერთმანეთის გამომრიცხავი ინფორმაციების მიუხედავად, ერთი რამ ცხადია, რომ მუსიკალურ სამყაროს კიდევ ერთი საუკეთესო ჯგუფი შეემატა.